بما إني لسة دوبي متخرجة يعني لسة فاكرة إيش يعني تكون و تكوني طالب و طالبة طب، أحب أشارككم بخطط و نصائح عملية و أشياء علمية تساعدكم في دراسة الطب، جربتها لما كنت طالبة و فرقت معايا كثير، و أقدر أقول بكل ثقة الحمدلله سنوات دراستي في الكلية كانت ممتازة بامتياز و أتمنى كل طلاب و طالبات الطب في العالم و في كليتنا العزيزة أم القرى تكون تجربتهم زيي و أحسن كمان ...
و كدة كم tips and tricks مني حتستفيدوا منها إن شاء الله
كثير طلاب و طالبات كانوا يسألوني و بيستفيدوا، بس قررت أجمعها لكم في مكان واحد يسير وقت ما تبغوها تلاقوها..و كمان تفيد أكبر عدد ممكن من الطلاب و الطالبات!
و أفتكروا دايما أي شيء تحتاجوه في الدراسة أو الكلية أو الأنشطة الطلابية يمديكم ترسلولي إما ع إيميلي أو أي مكان سوشيال ميديا " أحب التكست أكثر من الاتصال"
قبل ما أبدأ و أقلكم في شي مرة مهم أهم شيء في الحياة أبغاكم تنتبهوا عليه
مش الوصول للأهداف هو الشي المهم بس! مش المهم إنكم تستنوا بس إنكم تتخرجوا من الكلية عشان تسيروا دكاترة و تحققوا أحلامكم !
الأهم إنكم تستمعوا و تنبسطوا و تعيشوا بسعادة و إنجاز طول رحلة وصولكم للهدف!
و هنا قصدنا ع الكلية و على كلية الطب خصوصا!
في المرات الجاية حنتكلم عن أشياء مهمة، كيف تزاكر في الكلية، كيف تختاروا الكتب؟ هل ممكن يكون عندكم وقت فراغ؟ كيف تستمعوا بالويكندات؟ كيف تكونوا آكتف؟ سستم مزاكرة؟ كيف أزاكر لساعات قليلة؟ كيف أركز؟ كيف أحسن من ذاكرتي؟ كيف يترفع أو هل ممكن أصلا يرتفع المعدل؟ اختبارات عشان تعرفوا إيش نوع دراستكم المناسب لكم أكثر شي!
يعني حاجات مهمة و فيها ستاتسكس و أرقام و حاجات خطيرة!
بس اليوم حيكون حاجة خفيفة كدة تحميسية بمناسبة العودة للدراسة و الكلية J
Stay Tuned
