الحل السحري لتراكم المحاضرات، قرب الاختبارات، و التلحيق على اللي راح، بضمير مرتاح << يب واحد من مواهبي السرية الكتابة بالسجع ☄🤣
لا للسترس!
لا للعفرتة
لا للضمير اللي يعور
لا للندم على الوقت اللي راح
السر كله في اللحظة الحالية
في اليوم دا !
كيف تقدروا تعملوا دا كله؟ بسيطة
أمشوا ع البروتوكال دا و كملوا قراءة الموضوع و حتشوفوا بنفسكم 
نقسم كلامنا لمراحل عشان يترتب عقلكم و يكون أسهل لكم للمتابعة و لما تقرؤوا:
- Pre-Medication of Studying
- Studying Manegment
- Results and Reaaseement
Pre-Medication of Studying:
طالما بري يعني قبل، و نبدأ منه من اليوم، إيش حنعمل؟
-أجلسوا بهدوء،
-جيبوا كل المحاضرات اللي طبعتوها لو كنتوا تطبعوا، أو الآيباد أو اللاب لكل موادكم دي السنة.
- جهزوا الطابعة، لو مافيها حبر دحين روحوا أشتروا و تعالوا عشان تكملوا.
- جهزوا ورقة لكل مادة و قلم.
نبدأ مادة مادة بسم الله:
١- نعمل لست في ورقة خاصة لكل مادة.
أسماء المحاضرات كلها اللي أتأخدت من أول يوم في الدراسة لين اليوم بالترتيب.
٢- مطبوعة أو لا، أو مجهزة محملة في اللاب أو لا، لكل محاضرة مطبوعة حطوا صح قدامها، اللي مو موجودة دحين الآن تحملوها و تطبعوها. ( في المحاضرات الالكترونية سموا كل محاضرة باسمها و رقموها، ١، ٢، الخ المهم تكون مرتبة )
٣- الخانة الثالثة، أي محاضرة ذاكرتوها حطوا عليها علامة صح.
4- كل محاضرة مطبوعة و بتطبعوها رقموها بخط واضح ولا لون واضح المهم من مسافة مية متر تقدروا تشوفوا رقمها، و خلوها كللللها مرتبة و موجودة في مكان واحد، إما بملف، أو أي طريقة تناسبكم؛ أنا ما أحب الملفات فكنت أحط كل مادة باتجاه، مثلا الباثو بالعرض، فوقها الفارما بالطول، و زي كدة ...أعملوا اللي يناسبكم و يريحكم، و نفس الشي بالنسبة للمحاضرات الالكترونية، بنفس السستم، جهزوا مجلد باسم المادة، عنوان الملف يكون اسم المحاضرة، و نفس الشيء تكون مرقمة بالترتيب.
5- المادة اللي تخلص شيلوها من ع المكتب.
6- عيدوا الخطوات اللي فوق لكل مادة من المواد الباقية.
7- لو كان للمادة جزء عملي أو إختبار أوسكي، بنفس الطريقة اللي فوق، جهزوا لها لست بأسماء الكلاسات، و هل زاكرتوها أو لا، لأنه عادة تكون من كتب، لكن لو كان لها محاضرات نفس اللي فوق نعمله، ضيفوا عليها خانة Performe of physical examination
جربوا ع أي أحد من بيتكم، صغيرا كان أم كبيرا 🤣.
اللي عملناه فوق خطوة مرررة مرة مهمة صدقوني،
حتحسوا إنكم مرتبين، و دماغكم حيهدأ لأنه كل شي قدامه، و كل واحد منكم عارف بالضبط فين وصل و إيش باقيله و كم عدد المحاضرات لكل مادة، مجهز كل شي، محا تجلسوا تدوروا على محاضرات قبل الاختبار، عارفين فين واقفين بالضبط!
كدة غلقنا مادة ١ دحين، إيش نعمل بعدها؟
نبدأ نخطط و نقسم مزاكرتنا لقسمين.
١-قسم المحاضرات و الدروس الجديدة
٢- قسم المحاضرات القديمة.
أي محاضرة جديدة لأي مادة ( من بكرة أبدؤوا طبقوها)
١- تكتبوا اسمها في اللست اللي عملناها قبل، اللي فيها أسماء المحاضرات، عشان تكونوا مطمنين و متأكيد ١٠٠% إنه قائمتكم محدثة أول بأول و فيها كل شي.
٢- تطبعوها قبل المحاضرة بيوم.
٣- تتبعوا دي الخطوات السريعة لمذاكرة الجديد ( محا تاخد أكتر من ١٠ دقايق لو عملتوها منجد)
قراءة قبل تصفحها، حضور المحاضرة و التركيز فيها، قراءتها و مذاكرتها في نفس اليوم أول ما ترجعوا البيت.
الفيديو دا شوفوه عملته فيله تفاصيل أكتر تفيدكم بخصوص طريقة المذاكرة:
يسير كدة خلونا نجمع، كل المحاضرات اللي بتاخدوها جديدة حتزاكروها في نفس اليوم؛ اللي راح راح، لا تعلقوا فيله و تكتأبوا، يريتنا زاكرنا، عندنا الحاضر، اليوم و بكرة و اللي جاي، و هو اللي حيفرق و يصنع فرق. نتعلم و المرة الجاية نسير أحسن؛ و دحين نزاكر الجديد زي ما نبغى نعمل أو كنا حنعمل
So cheer up 
And get up
الوقت ما راح! أحسن وقت تاني للمزاكرة هو دحين.
يسير ما يتراكم عليكم، و تنجزوا لأنه برضه دي المحاضرات محسوبة و مهمة؛ و كمان عادة أغلب الكليات ماشية بالبلوكات، فيسير حتى لما تحضروا المحاضرات تستفيدوا و تحسوا إنكم ماشيين كويس لأنه زاكرتوا محاضرات دا البلوك حقت دي الأيام.
كل يوم أول ما ترجعوا نفس طريقة الفيديو، زاكروا المحاضرات اللي أخدتوها، كل اللي أخدتوه من بكرة الجديد نزاكره في يومها
٢- قسم المحاضرات القديمة:
هنا بعد الطباعة و بعد ما رتبنا الملفات حنبدأ بالتخطيط. إيش نزاكر و متى و فين و كيف ؟
حنبدأ نجهز جدول لأسبوع واحد، من بكرة الخميس لين الخميس الأسبوع الجاي يوم ٣٠ نوفمبر.
تبدؤوا من بكرة، يعني الخميس:
-حطوا في الجدول محاضرة وحدة بس تتزاكر، تكون محاضرة ما قد زاكرتوها، بس حلوة و تحبوها، يعني من مادتكم المفضلة أو لما حضرتوها فاكرين إنها كانت حلوة، المهم يعني محاضرة قريبة لقلبكم و ماقد زاكرتوها فهي تتزاكر بكرة أن شاء الله.
- بعد ما ترجعوا من الدوام و تصحوا العصر ولا المغرب يوم الخميس تزاكروها و خلاص.
ليش طيب؟ ليش محاضرة وحدة؟ ليش سهلة؟
عشان ندي نفسنا فرصة للتعود و الإنجاز، و نبدأ حبة حبة بالتدريج، و نحس بحلاوة إنجازنا، و يكون شي يحفزنا للأيام الجاية... أما لما نكبس الجدول و نمليه يسير هم على قلبنا بدل ما يساعدنا ☻
و دايما أفتكروا الحاجات الممتازة اللي حتعملوها لما تمشوا ع الجدول
أفتكروا إنكم زاكرتم الجديد اللي أخدتوه اليوم، مشيتوا على جدولكم و خطتكم، و خلصتوا محاضرة وحدة
و إيوة مو قليل!
باقي اليوم أستمتعوا فيه لكن لا تسهروا كثير عشان تستفيدوا من الويكند.
-لا تنسوا اللي قلنا عليه فوق، محاضرات اليوم الجديدة حقت يوم الخميس ٢٣ نوفمبر، ( اللي أول ما رجعتوا البيت زاكرتوها، أو في الوقت بدل الضائع، في الكلية بين المحاضرات، في السيارة و إنتو راجعين البيت( للبنات)، ي ويلكم لو تسوقوا و تزاكروا :) ، و إنتوا بتستنوا غداكم يتحمى)
نكمل التخطيط للأيام القادمة و باقي الأسبوع بعد الخميس اللي هو ٢٣ نوفمبر:
كيف نجهز الخطط الدراسية في دي الأوقات من السنة( محاضرات متراكمة، قبل الاختبارات الفاينل):
- أتذكروا إنكم عملتوا دي الخطة عشان تساعدكم تسيروا أحسن، مو عشان تطفشكم و تحسسكم إنه ما أنجزتوا؛
- لا تحطوا حاجات فوق طاقتكم، من زمان زي كدة أنا كنت، و أتعلمتها بعد فترة من التدريب و القراءة في الموضوع إنه كيف الواحد يخطط صح بالذات في المحاضرات؛ و مع خبرة دراسة الطب كمان، كنت من زمان مثلا أطل في أسماء المحاضرات، أوه دي مرة سهلة، خليني أحطها في جدول المزاكرة، أوه أقدر أغلق دي خليني أحطها، أحسن يسير أغلق بسرعة و أنجز أكتر و يكون عندي أوقات لأشياء تانية، و يسير الجدول متروووس محاضرات تتزاكر ☻
بس هل فعلا في يوم قدرت أعملها؟
لا
لأنه دي خطة مهي واقعية، أنا نسيت جانب مهم فيا و هو إني أمل بسرعة، فجدول متكدس كدة ما ينفع، و كل واحد فينا يعرف قدراته، و شخصيته، و إيش يناسبه و إيش ما يناسبه.
- طريقة توزيع المحاضرات القديمة في الأيام الجاية، بالذات لو كنتوا تدرسوا أكثر من مادة، مرة حتكون الخيارات مفتوحة و كثيرة و مرنة جدا.
- كل يوم قبل ما تناموا حطوا المحاضرات اللي حتزاكروها بكرة ع المكتب، أو لو كان وقت دوام ممكن تاخدوا وحدة معاكم بس هناك تزاكروها في الدوام، و الباقية لما ترجعوا.
- يسير المهم إنه تكون الخطة واقعية، و دحين حأقلكم مثال بالضبط كيف لأيام الويكند و أيام الدراسة و كيف تخلوه شي واقعي متناسق :
- يوم الجمعة و السبت ويكند، يعني في وقت أكثر لمذاكرة كم مادة و كم محاضرة.
- ممكن تحطوا وحدة محاضرة طويلة، وحدة محاضرة متوسطة، و وحدة محاضرة سهلة و تنطبق عليها نفس شروط محاضرة يوم الخميس اللي قلناها.
ممكن تكون مادة وحدة، و ممكن تكون كل محاضرة من مادة، على كيفكم، الخيارات مو محدودة المهم الفكرة و التطبيق.
- وقت البدء و طريقة البدء في المذاكرة، الوقت حسب ما يناسبكم و حسب ما تحبوا تزاكروا في الليل أو النهار، بس قسموا، مثلا وحدة في الصبح، وحدة في العصر، وحدة بعد العشا و خلاص.
- برضه طريقة ترتيبها، حابدأ أزاكر أي حبة؟ أنا مثلا حأبدأ بأسهل وحدة و أكتر محاضرة أحبها، عشان أتحمس و أصحصح و أنبسط من بداية اليوم إني أنجزت؛ و بعدين حأكمل الباقية.
- أهم شي المزاكرة بعقل متفتح، و المشتتات تكون بعيدة عننا، الجوال بعيد، المكتب مرتب فيله كل شي تحتاجوه و جاهز؛ موية جمبكم عشان مو كل شوية تروحوا و تجوا و تخرجوا.
- أمشوا برضه ع الطريقة اللي شرحتها فوق في الفيديو، أول شي سكم سريع ع المحاضرة، بعدين تقروها كلها سريع، ليش؟ غير فوائدها اللي في الفيديو أحيانا نص الوقت يروح و أنا أبحث عن معلومة، بس لو قلبت الصفحة حألقاها في وجهي -_- و بعدين المزاكرة.
- كل ما خلصتوا أسرع كل ما بقي وقت عندكم في اليوم فاضي تلعبوا فيه، الوقت مو مفتوح للمزاكرة وقت ما اخلص أخلص، لا !
حطوا لكم مدة واقعية، مثلا ساعة و نص للمحاضرة دي لازم أخلصها! و كل تركيزكم يكون عليها دي بس!
و حتخلصوا بإذن الله.
- في أيام الدراسة حيكون عندكم نص يوم، فتقدروا تخلوا محاضرتين، وحدة متوسطة الطول و وحدة قصيرة، حتى القصيرة تقدروا تاخدوها معاكم الكلية تزاكروها في الوقت بدل الضايع.
- ممكن برضه في أيام الأسبوع تخلوا بعد الدوام ساعة أو ساعة و نص لمذاكرة المحاضرات، دي أكتر طريقة مفيدة و ممتعة و أهم شي إنه وقتها محدد.
مثلا كنت أنا و صاحباتي ٤، كل وحدة مننا تزاكر قبلها بيوم محاضرة وحدة، و نجي تاني يوم كل وحدة تشرح محاضرتها و نحفظها سوا، فكدة كنا نغلق كمية أكبر من المحاضرات في وقت أقل.
حتى لما كان عندنا أوف كنا نعمل كدة بالذات لو في اختبار جاي، مرررة مفيدة الطريقة دي.
بس طبعا أختاروا صح مو مية وحدة في القروب محا تخلصوا كدة 
.
- لا تنسوا تحدثوا قوائمكم و لستاتكم أول بأول، أول ما تاخدوا محاضرة جديدة أكتبوها؛ و أعملوا تشك ع كل شي عملتوه، المحاضرات القديمة كمان أول ما تزاكروها حطوا تشك ع المزاكرة.
بحلول يوم الخميس القادم:
- حتكونوا خلصتوا ١٧ محاضرة قديمة ماقد ذاكرتوها بإذن الله، متفاوتة في الصعوبة و في الطول، و من مختلف المواد.
- حتكونوا ذاكرتوا كل المحاضرات الجديدة لمدة ٦ أيام من بكرة الخميس لين الخميس الجاي.
بعد أسبوعين يعني يوم ٧ ديسمبر:
٣٤ محاضرة!
و محاضرات أسبوعين الجديدة كلها!
شايفين كيف حجم الإنجاز؟ و جدول مريح خفيف لطيف!
إذا مهمة اليوم إيش:
- تجهيز List و قوائم لكل مادة نفس الطريقة اللي فوق.
- تجهيز خطة المذاكرة لبكرة الخميس لين الخميس القادم ٣٠ نوفمبر.
- بعدين reasses، شوفوا ماشيين كيف؟ طالعوا في حجم الللي أنجزتوه، و كملوا على كدة لين ويكند قبل أول اختبار.
- يومها خدوا بريك صفوا ذهنكم فيه، و بعدين أبدؤوا زاكروا مادة اختبار يوم الأحد.
اليوم ٢٢ نوفمبر..
حتبدؤوا إن شاء الله من بكرة يوم ٢٣ نوفمبر.
و الاختبارات آخر ديسمبر أفتكر ٣١ ديسمبر تقريبا.
فرصة كبيرة
حتحسوا بالفرق صدقوني
أهم شي الترتيب، و عارفين فين ماشيين؛ و شايفين نفسكم بتتقدموا
و جدول مريح
و عندكم وقت!
في وقت!
المهم تبدؤوا دحين
لما تطبقوه شاركوني، اليوم و الأسبوع الجاي و إيش حتعملوا reasses
متأكدة حتستفيدوا منه بإذن الله
بالتوفيق لكم
